Relatu Progresivu

lunes, 23 de junio de 2008

II.

La yegua es negra. Asciende anjeando, la boca fruncida de baba ajeláa. Las herraduras son bayonetas romas que jiendin la ñevi. Busca las alturas donde asoman las pistañas más largas de la herba. La dueña la busca a ella.

lunes, 2 de junio de 2008

I.

Las contraventanas del dormitoriu, combláas de luz inaugural, acómbanse en un aliendu jondu, cumu d´anantes de sumergite nel augua con una pinza ena ñariz. Las línias de luz jolastera escanean con lentitú de güei el cuerpu de una chica que durme en un jergón de hoja de panoja. Conos sus viecos y esparajismos involuntarios, el jergón crepita cumu´n hojascu que se alampa.

Espierta de súpitu, abutragando bocaos d´airi p´ajuegar l´ecu d´un gritu que tuvía li retingla nel gargüelu. Espúrrese: brazos y piernas son ráices aérias a buscu de la guía vertical de la gravedá. Arretira´l cubertor d´un jalatu y levántase cumu´n animal ercíu pol vértiz inflamáu d´un géiser.

Pliega las contraventanas y limpia cona manga del camisón el vafu del cristal. Al otru láu el sol apreta la ñevi contra la tierra. Tan sólu asoman las pistañas más largas de la herba. La luz saca punta a las pupilas de la chica, qu´abaldona la ventana con ciescos ingrávidos ena vista.

Espréndese del camisón, tan remendáu y con tantos crucuños que paez otru, y queda esnuga. El cuerpu tuvía timpiu de la nochi. La ropa está destendía nel respaldu d´una silla col asientu d´espartu enmarañáu y con ñudos cumu tendones de res vieja. Paez el calabri d´un tapiceru. Aviéntala, zis zas, con juerza y vístese de siguíu, ensin perder el molde del airi que la emburria cumu una vela cara´l espeju chicu que pende de un clavu esmidíu de jerreru ena puerta. Arrecuéjese´l pelu con una varilla de maera pálidu d´abidul, no marfil ni urquilla. L´espeju está cruciáu por una veta de ósidu que abregona´l refleju del su rostru. Aposa la manu isquierda ena superficie vertical y fríu del espeju mientes cona derecha restriégase las comisuras de los ojos brumíos de magaña endurecíu.

Buceza.

Abri la puerta y adiéntrase ena penumbra qu´inunda la casa.

L´espeju mécese y ajonda l´arcu - ires invertíu que lija l´envés de la puerta. El resclave de la su manu isquierda esvanécese cumu rastru de jumu o ñebla.

Archivo del blog